سقوط الرجال"تيم حسن" قصي خولي وعابد فهد"

سقوط الرجال"تيم حسن" قصي خولي وعابد فهد"

الدكتورة ميسون سنكري

قاومت هالسنة احكي عن مسلسلات رمضان هالشهر اللي جبروه يتحول لشهر ترقب ومتابعة مسلسلات بلا قيمة تذكر  للأسف، تدريجياً تحولت المسلسلات لقتل وإجرام وخيانات بالجملة متوجة بعرض أزياء النساء(اللبنانيات تحديداً) وزكرتاوية الرجال(السوريين تحديداً).
من يومين سمعت انو خمسة ونص أعلى rating ، كيف يعني؟وليش؟ مشان نادين نجيم؟والا مشان  معتصم وقصي؟
نادين الكلاسي بجمالا  (ان اعتبرناه جمال) الاصطناعي بعد النفخ والفيللر و ووو ... بقوة تمثيلاً ؟! لكن شبوبية معتصم وقصي؟؟
بالأصل ايمت طلع معتصم النهار؟يمكن كان يشتغل بالليل لحتى ماسمعنا فيه من قبل، وقال لسا مابلش دورو، شو حيبدع لسا ؟ أما قصي فضيعانك ياقصي، من الأدوار العظيمة التاريخية والاجتماعية لهالدور السخيف، طاقات كبيرة على دور بايخ  طبقت المثل اللي بيقول جنازة كبيرة والميت إبداع بتجسيد الدور بس شو هالدور! معقول؟ وغير سخافة الدور مدري شو عامل قصي بوجهو، فيلر مدري بوتكس؟ماعندي خبرة فيهن!

للأسف بعد ماسقط تيم حسن لتلت سنين ع التوالي بهالهيبة قليلة الهيبة يتابع كبار الفنانين السوريين الرجال السقوط وهلق إجا دور قصي خولي وماتوقعت يسقط هيك، لازال تيم يسقط أكثر وأكثر في مستنقع الترويج للمخدرات وحمل السلاح وملاحقة الفاتنات بقصة تافهة ، من خلال بعض المشاهد هذا العام امتنعت تماماً عن المتابعة، ضيعان اغاني ناصيف زيتون.
حاولت تابع الباشا، اسم رشيد عساف يغري بالمتابعة، العفا شو هاد؟ ضيعانك يا رشيد، شو هالمرجلة الكاذبة وهالحركات ، مافيني كتر حكي عن هالمسلسل لأنو ماقدرت كمل مشهد على بعضو.
طيب هتشكوك سوريا (باسل خياط) في الكاتب، لا تعليق، ريتو عمل جزء تاني من تانغو، يمكن كان أحلالو وأحلالنا.
طيب معلش بيضل عنا مسافة أمان ودقيقة صمت، مابهن شي! حطينا أملنا فيهن لنقدر نتابع قصص معقولة، بس شو؟
أول ليلة من رمصان ماقدرت نام بعد أول حلقة من دقيقة صمت، حسيت حالي معن بغرفة الاعدام وصادر علي حكم بلا ما أعمل أي جريمة  والا من كتر مالقيت سهل ينعدم ناس ويتبرأ ناس تانيين، المشاهد فعلا كانت مبالغ فيها ومخيفة، قلنا معلش فداء للقصة ، كملنا، اي شو هاد؟شو عم يصير بآخر حلقات؟استخفاف رهيب بعقولنا، ومابعرف شو حتكون الخاتمة؟يسوع قام من بين الأموات،وهلق دور عابد فهد ، معقول الاستخفاف بالعقول لهالدرجة، ماعاد يتتابع ، اللهم الا مشاهد سلنغو الضيعة الضايعة ولفتني عدم اعتماد البطلة على إبراز المفاتن وعرض الأزياء، اما عابد فهد فوالله هلكتنا تعصور ، صدقني السنة الماضية طريق كان أشوى يا عزيزي .
شو بقي نتابع يا سادة يا كرام؟بقي مسافة أمان، مع انو معقول بكتير من أحداثو بيعكس واقع عم نعيشو ، بس ليش يعني قصص الخيانة الزوجية صارت اختصاص رمضان؟ليش كل وحدة سافر او مات زوجها تدور ع بديل بأي طريقة أو وسيلة.

انو فعلا ياريت نرجع لرمضان أيام زمان، ايام المحطة الوحدة، لما كنا نستنى نتعلم كم أكلة جديدة من برنامج الطبخ اللي كان يطلع برمضان وبس، وكان طقسنا نعمل حلو ساعة الافطار، ونحضر الفوازير وشي برنامج مسلي أو  مسلسل جديد عليه القيمة، حتى المسلسلات التاريخية والدينية كانت بتتابع.
سقى الله..للأسف سنة عن سنة عم نرجع لورا، وين بدنا نوقع لسا.


(الصورة لبطلة دقيقة صمت ستفاني صليبا، جمالها الهادئ وبدون اعتماد ع الإغراء ملفت، بالتمثيل بدا فت خبز بعد)

التعليقات

Toni Khouli 2019-May-30

اجمل ما قرأت كاني اكتب ولست اقرأ ولعله عنوان جديد لمسلسلس جديد سقوط الرجال

كندة 2019-May-29

من اجمل واصدق ما قرأت،باسلوب قريب للقلب عبّرت عن راي المشاهد السوري ، والسوري حصرا لانه متعود على مستوى راقٍ من الدراما لن يتكرر على ماببدو...... اشكر تميّزك وصراحتك

إضافة تعليق