رغدة تشن هجوماً على بعض مسؤولي البلد لتقصيرهم بحق أسر الشهداء

المشهد- تواصل اجتماعي
شنت الفنانة السورية رغدة عبر صفحتها على موقع فيسبوك هجوماً حاداً على بعض المسؤولين في سورية لتقصيرهم بحق أسر الشهداء وتغاضيهم عن وضعهم المتردي وعدم مساعدتهم ودعمهم و استغلال حضورهم لبعض مراسم دفن أبنائهم الشهداء للحضور الإعلامي والتصوير و(البروظة).

وقالت الفنانة رغدة: وبعدين يامتفزلكين ومتفزلكات  يللي داخل المدن وعم بتعانوا من الأزمات المعيشية ، شو بتعرفو عن كل الضيع وأوضاعها وأوضاع أهاليها ومعاناتهن؟ شو بتعرفو كيف عايشين ومنين ؟ شو بتعرفو عن مناطق خارج مدنكن اللي أنتو فيها عم بتنقو ع كل شي وأنتو أصلا مرفهين بزيادة عن المفجوعين بولادن وفقرهن، والصف التاني والتالت من الحكومة ومن بعض المحافطين وأمناء فروع الحزب ورؤساء الدوائر وصولا للمخاتير، هدول الناس ولا حدا منهن على مدى سنين تأفف من عجزو المادي ولا من شح الأرض اللي جفت عروقها لغياب ولادهن اللي كانو يفلحوها ، بتعرفو شي عن أهل شهيد في ضيعة من الضيع اللي المختار قطع عنهن  المي لأنو اشتكوه لأمين فرع الحزب اللي أصلا ماسأل عن شكوتو،  شو بتعرفو عن ضيعة كل مناشر غسيلها فوق سطوحها أسود  وماعاد فيها غير نسوانها وولادها الصغار يشتغلو في أراضيها، شو بتعرفو عن ضيعة تالتة بيتكرم فيها أهل الشهدا ء بشوية معلبات وكم كيس رز وشعيرية و زيت واذا حدا منهن فتح تمو وسأل وين بقية التكريم بيستبعد من التكريم ، شو بتعرفو عن أم  لثلاث شهداء في ضيعة  من هالضيع دافنتهن في أرضها ورح تتاخد منها الأرض لأنها كانت  مستأجرتها لولادها الشهدا كانو يزرعوها الللي ف الاخر هنن انزرعو فيها ومش عارفة مصير قبورهن من صحاب الأرض  اللي ساكنين في المدينة، شو بتعرفو عن أم شهيدين من ضيعة من هالضيع رفضت تدفن شهيدها  التاني في حضرة المختار وأمين فرع الحزب والمحافظ اللي جايين يتبروظو مع الكاميرات  ولما انكشحوا دفنتو وزغردت ودعت ل الله يخلص الرئيس من هل الكائنات قبل ماتدعي لابنها الشهيد ، شو بتعرفو عن صاحبة التنور  اللي ع الطريق بين هديك الضيع اللي ولادها واحد مخطوف والتاني شهيد والتالت عم يخدم جيش في منطقة ساخنة  وكل همها الله ينجي بقية شبابنا من الخاطفين وينصر جيشنا ويرجع الأمان. 
وتابعت الفنانة رغدة: شو بتعرفو عن ضيعة نسوانها وبناتها بيحفرو قبور ولادهن ورجالهن اللي عم يخدمو في الجيش على الخطوط الساخنة  وكل همهن يأمنو ع بيوتهن وأرضهن اللي شقيانين فيها ، شو بتعرفو عن أبو الشهيد الفقير بضيعة  من الضيع  اللي رفض يسلم سلاح ابنو الوحيد بعد ما استشهد والتحق بقوات رديفة ليحارب بدالو  ، و غيرو غيرو وكتيرشافوه وعاشوه المعتربين و بأشد الأيام الصعبة وقت اللي كنتو انتو عم تتفزلكو وتنظرو  عشاشات حواسبكن أو بالقهاوي و عالتلفزيونات ،   فالله يرضى عليكن لاتزايدو ع سمانا وروحو شوفولكن شي  مفيد تعملوه في البلد وبلاه هالنق المتواصل والأفأفيه اللي بتحرق تراب الشهدءا وأهاليهن اللي عاضين على الجرح وساكتين ، وماكنا مضطرين لكل هل الشرح وهالصور من صور كتيرة كانت مطوية في الدفاتر بس الظاهر مابينفع الواحد يضل ساكت  وقلبو يدفع التمن لأنو الذاكرة عند البعض سمكية قصيرة وعند البعض الآخر متناسية لهيك وجب النطق .