تبهدل المصور!

تبهدل المصور!

المشهد بالشقلوب

قاعد أنا وجاري أبو الريم وعم نتحدث، وإلا بقلي: لك سمعت عن هادا اللي اشترى السيارة بأربعمية مليون ليرة سورية؟

قلتلو: أي سمعت عنو بس صحيح مين هادا؟

قلي: لك شو بدك فيه، بس بتعرف اللي نشر مقطع الفيديو شو صار فيه؟

قلتلو: لا والله ما بعرف شو صار فيه بس شو اسمو اللي اشترى السيارة؟

قلي: يا سيدي اتشرشح لولد ولدو، وتبهدل بهدلة الها أول ما الها آخر.

قلتلو: لأنو اشترى سيارة تبهدل؟ الله أعلم من وين جايب المصاري.

قلي: لك لاه يا أبو بهيج من اللي اشترى السيارة، هادا حقو يشتري اللي بدو ياه، ما حدا الو عليه شي.

قلتلو: لكن مين اللي تبهدل؟

قلي: لك اللي صور ونشر الفيديو، التعن أبو أبوه، ويا سيدي الله العليم بيعرف وين صار.

قلتلو: العمى، معقول مصور شخصيات سرية ما حدا بدو يعرفا؟

قلي: لك لاه بس هادي المواضيع ممنوع تطلع لبرا يا أبو بهيج، الأعداء كتار حوالينا، وما كلشي عنا بسوريا لازم يشوفوه اللي برا.

قلتلو: يا سيدي الله يكون بعونو ويساعدو.

قلي: الله لا يردو، وكل واحد بدو يتفزلك ويطول لسانو ويتدخل بشي ما الو فيه دخل، هيك لازم مصيرو.

قلتلو: طيب أبو الريم لو سمحت بدي اسألك، بما أنك واصل وبتعرف كتير قصص بالبلد، من وين هادا معو 400 مليون ليرة ليشتري فيها سيارة، يعني مو حرام واحد يكب كل هالمصاري عسيارة؟

قلي: أبو بهيج أنت ما بتفهم يعني؟ هلق لسا عم قلك أنو اللي بيطول لسان وبيتدخل بشي ما الو فيه دخل رح يتبهدل بهدلة طويلة عريضة.

قلتلو: لا خيو لا دخيل ربك، ما تآخذني أبو الريم ما ضيفتك شي، بس والله الغاز خالص عنا من أسبوع، وقدامي عالدور لسا في 280 شخص، وبالله حتى أنو مخصصاتنا عالبطاقة الذكية من السكر والشاي خلصو، لهيك بتاكل بزر لحطلك؟؟



 


 

شارك برأيك .. لتكتمل الصورة


استطلاعات الرأي

يجب ان تختار خيار قبل ارسال التصويت
التصويت على العمل الدرامي السوري الأبرز خلال الموسم الرمضاني الحالي:
مع وقف التنفيذ
كسر عضم
الفرسان الثلاثة
على قيد الحب
جوقة عزيزة
للموت ج2
الكندوش ج2
حارة القبة ج2
النتائج
مع وقف التنفيذ
كسر عضم
الفرسان الثلاثة
على قيد الحب
جوقة عزيزة
للموت ج2
الكندوش ج2
حارة القبة ج2

الأكثر مشاهدة هذا الشهر