المؤامرة الكورونية!
-
المشهد - 2020/02/05
- 1161
المشهد بالشقلوب
مبارح كنت قاعد أنا وجارنا أبو الريم وسألتو أبو الريم بالله شو قصة هادا مرض الكورونا... قلي يا زلمة والله مرض خطير كتير، صار مطير نص الصين، وكل يوم عم يموت شي مليون صيني منن.
وهون أم بهيج سأليتو بصوت عالي أقرب إلى الصراخ: شحاري كيف عم يلحقو يدفنوهم؟؟ قلا أبو الريم والله يا خيتي أم بهيج عم يحرقوهن حرق.. مستحيل يلحقو حفر لأنو..
وسألتو لأبو الريم وقلتلو عم يقولو أنو متل الرشحة، وفيك تعالجو بالكمون وبالزهورات العادية.. وسألني أبو الريم من وين جبت هالحكي؟؟ .. قلتلو شفتا عصفحة الطب العربي والتداوي بالأعشاب البرية النصف مروية .. قلي ولك هادا صاحبها جاركم ابن أبو عبدو بياع المازوت اللي قاعد بالدكان محل أبوه.
أنا انصبت بالذهول وقلتلو أنت كيف عرفت؟ قلي من فترة شحطناه كان كاتب بوست عم ينتقد فيه واحد من المسؤولين .. قلتلو لك كمان شفتا بصفحة عالج نفسك بنفسك أحسن ما يختفي نفسك .. قلي هي صاحبا طالب صف سابع بمدرسة بجنب ضيعتنا..
انصبت بالذهول أكثر وقلتلو ولك من وين عرفت؟؟ .. قلي ولك نحنا منعرف كلشي.. وبالمناسبة قلو لأبنك بهيج أنو ما في داعي يحكي عن غلا السكر هالأيام، هالحكي بيجيب وجع راس..
قلتلو: أي خيي أبو الريم طيب في حال انصاب واحد من الحارة من عنا بكورونا شو لازم نعمل؟؟ .. قلي: ما بتعملو شي نحن منعمل كلشي .. مع أنو لسا ما أجتنا تعليمات واضحة بالموضوع بس عالأغلب اللي بينصاب يتاخد عالتحقيق ونشربو عنا كاسة شاي لحتى نعرف من وين انصاب من المرض.. وإذا ما طلع عليه شي تاني رح نتركو وما فينا نعمل معو شي ..
قلتلو: طيب خيي أبو الريم ما لازم تعمل خطة لحتى ما يوصل لعنا كورونا.. قلي: بإذن الله ما بيوصل لعنا... تآمرت علينا كل الدنيا وما طلعلا معنا.. فيروس كورونا ما بيغبر على صرمايتنا .. قلتلو: بالله صدقت
