إن لم تستحي فافعل ما شئت

إن لم تستحي فافعل ما شئت

المشهد بالشقلوب

مبارح المسا إجا لعندي بهيج الله يخليه ويخلي ولادكم وسألني بابا اليوم الآنسة قالتلو لرفيقي إذا لم تستحي فافعل ما شئت.. شو يعني؟؟

قلتلو بابا حبيبي بهيج يعني إذا ما عندك خجل وفأنت قادر تعمل اللي بدك ياه، يعني ما بيضل عندك وازع أو مانع يردعك عن القيام بأفعال غير جيدة.. فهمت بابا حبيبي بهيج؟؟

قلي يعني هلق الكهربا ما بتستحي؟؟ .. قلتلو ليش شو دخل الكهربا؟؟.. قلي لأنو بيقطعوها أيمت ما بدن حتى لو قالولنا أنو التقنين بأوقات معينة.. وأحيانا بتجي الكهربا قوية كتير لحد ما انضرب البراد من يومين.. قلتلو بابا حبيبي بهيج يعني ممكن تطبق هادا المثل عالكهربا..

قلي بابا طيب هادا الدكنجي اللي عنا بالحارة ما بيستحي؟؟.. قلتلو ليش؟؟ قلي لأنو بيضل يرفع الأسعار وبيقول أنو طلع الدولار.. بابا صحي لوين بيطلع الدولار.. قلتلو والله يا بابا يا حبيبي كل هدول ما بيستحو..

قلي بابا يعني هلق كمان المختار وبياع الغاز عنا ما بيستحو؟؟.. قلتلو ليش؟؟ قلي لأنو بيوزعو جرار الغاز متل ما بدن وكل ما رحنا وقفنا عندن بالدور ما بيعطونا مع أنو بيجي أبو الريم بعد شوي وبياخد غاز.. قلتلو يعني فيك تقول هيك شي ...

قلي طيب بابا هادا أبو الريم كمان ما بيستحي؟؟ قلتلو ليش ؟؟ قلي لأنو بيضل عم يعيط بالشارع.. وبيصف السيارة بنص الشارع وما بيخلي حدا يمر.. وبيضل معلق المسدس عخصرو وبيخوف العالم فيه ... وما حدا بيسترجي يحكي معو .. قلتلو أي بابا حبيبي يعني فيك تقول هادا ما بيستحي..

قلي بابا عندي كمان رفيقي بالمدرسة عندو عمو ما بيستحي.. قلتلو ليش؟.. قلي لأنو رفيقي بيضل يقلي عمي فيه يعمل اللي بدو ياه بالبلد.. قلتو ليش شو بيشتغل عم رفيقك؟؟.. قلي ما بعرف بس رفيقي بيقلي أنو هو مسؤول كبير..

 



 

شارك برأيك .. لتكتمل الصورة


استطلاعات الرأي

يجب ان تختار خيار قبل ارسال التصويت
في ظل الظروف الحالية.. برأيكم ما هو السن المناسب للزواج بالنسبة للشباب في سورية؟
بين 25 و 30 سنة؟
من 30 الى 35 سنة؟
بين الـ 35 و الـ 40 عاماً
بعد الاربعين؟
النتائج
بين 25 و 30 سنة؟
من 30 الى 35 سنة؟
بين الـ 35 و الـ 40 عاماً
بعد الاربعين؟

الأكثر مشاهدة هذا الشهر