حمل المسؤولية!

حمل المسؤولية!

المشهد بالشقلوب

من يومين قاعد عم اتغدى أنا وابني بهيج الله يخليه ويخلي ولادكم، فاستغربت شفت الولد عم ياكل بشكل ما طبيعي أبداً، وعم يكبر اللقمة، وعم يحاول ياكل أكتر من الكمية اللي ممكن يستحملا، فسكتت وما حكيت شي لأني من أنصار التربية الحديثة وبخلي الولد على راحتو.

بعد الغدا تسطحت شوي وقمت مريت حد المراية، لقيت بهيج الله يخليه ويخلي ولادكم واقف قدام المراية عم يمشط شعرو بطريقة غريبة ويكبسو بالجيل، وموديل الشعر اختفى من زمان، كمان ما حكيت شي لأني متل ما بتعرفو من أنصار التربية الحديثة، وبخلي الولد على راحتو.

العصريات قبل المغرب التقيت ببهيج الله يخليه ويخلي ولادكم وهو طالع برا البيت، ولفت انتباهي كتير أيدو، لابس ساعة لونها دهبي وزنا حوالي 4 كغ، وخاتم دهبي وزنو حوالي 400 غرام، ومع فص أسود كبير كمان، وكمان ما حكيت شي لأني متل ما بتعرفو من أنصار التربية الحديثة وبخلي الولد على راحتو.

والمسا لما رجعت من القهوة شفت ابني بهيج الله يخليه ويخلي ولادكم عم يقرا كتاب، الصراحة انبسطت، بس استغربت كتير لما شفت عنوان الكتاب الفرق بين الفلسفتين الديموقراطية والأبيقورية عن الطبيعة لكارل ماركس، وكمان ما حكيت شي لأني متل ما بتعرفو من أنصار التربية الحديثة وبخلي الولد على راحتو.

المسا لما بدي نام قالتلي أم بهيج: أبو بهيج مو ملاحظ أنو ابننا بهيج متغير؟؟.. وصاير عندو تصرفات غريبة، واليوم كان عم يقول لأختو بهيجة، وليك بمسح فيكي الأرض وإنتي لسا ما بتعرفيني عالمزبوط .. لك أنا الدولة كلا ورايي وليييك .. قلتلا نامي يا أم بهيج بكرا منشوف الموضوع انشالله.

تاني يوم الصبح شفت بهيج الله يخليه ويخلي ولادكم، وقلتلو: بابا حبيبي بهيج صاير معك شي، تصرفاتك صايرة غريبة، ليش عم تاكل كتير وتجبر حالك عالأكل؟؟ ليش عم تلبس ساعة وخاتم ذهب؟ وليش عم تمشط شعرك بهي الطريقة؟؟ وليش عم تقرأ كتب كارل ماركس؟؟ وليش حكيت مع أختك بهيجة بهاد الطريقة؟؟؟

جاوبني بهيج الله يخليه ويخلي أولادكم : بابا أنا عم اتدرب لصير مسؤول ...





 

شارك برأيك .. لتكتمل الصورة


استطلاعات الرأي

يجب ان تختار خيار قبل ارسال التصويت
في ظل الظروف الحالية.. برأيكم ما هو السن المناسب للزواج بالنسبة للشباب في سورية؟
بين 25 و 30 سنة؟
من 30 الى 35 سنة؟
بين الـ 35 و الـ 40 عاماً
بعد الاربعين؟
النتائج
بين 25 و 30 سنة؟
من 30 الى 35 سنة؟
بين الـ 35 و الـ 40 عاماً
بعد الاربعين؟

الأكثر مشاهدة هذا الشهر