انتصار خلبي
-
المشهد - 2020/05/31
- 1608
المشهد بالشقلوب
مبارح مر لعندي أبو الريم المسا وقلي: ألف مبروك يا أبو بهيج، انتصرنا على كورونا، خلص الحكومة رفعت الحظر، وصار فيك تطلع أيمت ما بدك، بالليل بالنهار، وصار فيك تسافر وين ما بدك يا أبو بهيج..
قلتلو: والله غريب هالكورونا اللي عنا يا أبو الريم، اتخاذل وانهزم عنا بأسرع مما كنت أتخيل، يعني العالم كلو عم يعاني منو ونحنا خلصنا منو حتى قبل ما يبدا..
قلي: يا أخي الحكومة عملت خطة ونجحت، وما خلت المرض ينتشر، لهيك قدرنا نتخطى الأزمة بأقل الخسائر، وفشل المخطط اللي كان مرسوم لسوريا، بسبب تنفيذ الشعب للمخططات المرسومة بحذافيرها، وتكاتف الشعب والحكومة في التصدي للمؤامرة الغربية التي كانت عم تهدف للنيل من صمود الشعب..
رفعت حواجبي تعجبا وقلتلو: يا أبو الريم وقف شوي، شو دخل المؤامرة بالموضوع، الدول الغربية نفسها التعن أبوها من المرض، أصلا ما حدا عندو وقت يتآمر علينا بهيك موضوع..
ابتسم أبو الريم ابتسامة خبيثة وقلي: هادا الحكي مو من عندي يا أبو بهيج، هاد الحكي سمعتو من رفاق كبار، وبدك ياني ما صدقهم، هدول بيعرفو أحسن مني ومنك، وما تستغرب أنو الدول الغربية تكون نشرت المرض ببلادها لحتى يوصل لعنا... ما في شي بيتكذب عنن هدول...
بما أني ما بقدر قول قوم انقلع يا أبو الريم: قلتلو أنا معك يا أبو الريم، خلينا نلعب دق طاولة زهر، ونشرب كاسة شاي من مخصصات البطاقة الذكية، لأن ما قدرت اشتري علبة متة، لذلك بدك تعذرني.
