شو يعني؟
-
المشهد - 2020/02/09
- 1597
المشهد بالشقلوب
قاعد أنا وابني بهيج الله يخليه ويخلي ولادكم وإذ بيسألني بابا شو يعني مجلس الشعب؟ لأن سمعت بالمدرسة رفيقي عم يحكي إنو في انتخابات لمجلس الشعب.. قلتلو يا بابا يا حبيبي مجل الشعب هو المكان اللي بيروحو عليه ممثلين الشعب منشان يجتمعوا منشان الشعب..
قلي بهيج: يعني بسام كوسا وفايز قزق وانطوانيت نجيب بيجتمعوا هنيك؟ .. قلتلو لا يا بابا يا حبيبي ممثلين يعني نواب يعني بيحكو محلك، يعني بدل انت ما تروح انت تحكي مع الحكومة عن مشاكلك وشو ناقصك، هني بيحكو عنك..
قلي بهيج: يعني في حدا بمجلس الشعب بيحكي للحكومة أنو بدي بوط جديد لأن بوطي هادا نصو رايح وعم يدخل مي بالشتوية، وأنو بدي جاكيت جديدة لأن القديمة صارت صغيرة عليي، وأنو بنطلوني الجنيز صار كاشف من جرياتي أكتر من مغطى..
قلتلو: بابا حبيبي يعني مو لهدرجة لأن هي مشاكل شخصية خاصة فيك أما بمجلس الشعب يعني بيحكو عن مشاكل عامة بتكون صايبة كل الشعب، مو بس شخص أو تنين، لما بتكون المشكلة عند ناس كتير هي المشاكل اللي بيحكو فيها بمجلس الشعب...
قلي بهيج: طيب بابا مو هديك اليوم سمعتك انو الكهربا صارت مشكلة حقيقية، وأنو تأمين الغاز صار مشكلة، وأنو الأسعار صارت مشكلة، وأنو الرواتب صارت مشكلة، وأنو كلشي بالبلد صار مشكلة، هي المشاكل اللي بيحكو عليها بمجلس الشعب؟؟
قلتلو: بابا حبيبي تماما هي المشاكل اللي بيناقشوها بمجلس الشعب، وبالإضافة لمناقشة المشاكل بيقروا وبيشرعوا القوانين، وبيحجبوا الثقة عن الحكومة وبيشكلوا اللجان لمتابعة عمل الحكومة، وكتير قصص نحن ما منفهم فيها..
قلي بهيج: بابا بس لحظة منشان المشاكل يعني بناقشوا المشاكل ما بيحلوها؟؟.. أنا هون تلعثمت وما عرفت شو أحكي.. قلتلو بابا حبيبي مو كل المشاكل فيك تحلا، بس يعني فيك تحاول حلها، صحيح يمكن ما تنجح بس عالأقل لازم تحاول ولو محاولة مو مشكلة.
قلي بهيج: طيب بابا فهمت شو بيعمل مجلس الشعب بس في كلمة ما فهمتا يا بابا.. قلتلو: بابا حبيبي اسألني وأنا بجاوبك.. قلي: بابا ما فهمت شو يعني انتخابات.... قلتلو: بابا حبيبي بهيج قوم انقلع العب مع رفاقك ..
