صباح الليرات!
-
المشهد - 2020/01/27
- 1106
المشهد بالشقلوب
مبارح إجا لعندي إبني بهيج الله يخليه ويخلي ولادكم.. وقلي بابا بدي ليرة .. قلتلو بابا حبيبي روح على بنطلوني وخود من الجيبة 500 ليرة اشتري شي شغلة الك من الدكان.. قلي لا بدي ليرة وحدة... قلتلو يا زلمة من وين بدي جبلك ليرة.. قلي ما بعرف دبرلي..
راح نكش بالبيت هو واختو بهيجة الله يخليها ويخلي ولادكم.. وبالفعل لاقو ليرتين وراحو اشتروا فيها سندويشتين شاورما.. أنا صابتني الدهشة... العما صندويشة الشاورما بليرة وحدة؟؟.. جبت بهيج وبهيجة وقلتلن بابا حبيبي شو قصة الشاورما والليرة؟؟
قالولي بابا في محلات عاملة عروض وعم تبيع غراض بليرة وحدة...وفي مطاعم عم تبيع سندويش بليرة وحدة... قلتلن العما .. لك بليرة؟؟ والله غريب..
المسا اجا لعنا جارنا ابو الريم وقلي والله يا جار اليوم اشتريت نص غراض البيت بليرة .. قلتلو يا زلمة من وين جبت هالليرات؟؟ لك انمنع التعامل فيها من عام 2013.. قلي والله يا جار بالشارع صرت تلاقي عالم عم تبيع الليرة بخمسمية ليرة .. وحتى وصلت للألف أحيانا..
قلتلو يا جار طيب هالمحلات اللي عملت هالقصة معروفة صغيرة وعقد حالا .. طيب هالشركات الكبيرة والتجار الكبار شو باعو بليرة؟؟...قلي ابو الريم والله يا جار أغلب الظن هني اللي باعونا الليرة بخمسمية.
