إفشاء أسرار دولة!
-
المشهد - 2019/12/15
- 1357
المشهد بالشقلوب
كنت قاعد من كم يوم مع ابني بهيج الله يخليه ويخليلكم ولادكم بالضيعة قدام البيت، وعم نحكي عن دراستو والمدرسة والمعلمات والمذاكرات والى ما آخره..
وبلحظة صفا سألتو بابا حبيبي بهيج شو بدك تصير لما تكبر؟ .. قلي يا بابا بدّي صير متل كل العالم اللي منعرفا.
قلتلو يعني بدك تتطوع بالأمن؟ قلي لاه لاه الأمن صار موضة قديمة .. قلتلو لكن شو بدك تصير .. قلي بدّي صير صحفي متل كل هالشعب ..
قلتلو: يعني بدك تدخل كلية الاعلام؟ ... قلي: ولشو كلية الإعلام ؟
قلتلو بصير تصير صحفي بلا كلية الإعلام؟ .. قلي يا بابا يا حبيبي خريجين كلية الإعلام كلن قاعدين بالبيت لا شغلة ولا عملة، أما اللي ما دارس إعلام فهو اللي شغال وهو اللي ماسك وسائل الاعلام ببلدنا .. وبعدين ممكن صير صحفي سياسي أو اقتصادي أو رياضي شو بيكون دارج بوقتو ..
قلتلو بابا حبيبي بهيج وشو بدك تعمل اذا صرت صحفي؟ .. قلي يا بابا أنا بدّي إعمل شي غير كلشي عملوه الصحفيين ببلادنا ... قلتلو وشو عملو الصحفيين؟
قلي المشكلة انو ما عملو شي، ولو عملو فهني عملو بناء على تعليمات من فوق، ودائما عّم يطلعو انو عنا الوضع عال العال، وانو المسؤولين عنا عّم يعملو كل جهدن بالبلد وانو ما في اي شي له علاقة بالأزمة، وان الشعب ما بيستاهل هالتضحيات اللي عّم يقدما سيادة المسؤول.
قلتلو والله أنا ما بحضر تلفزيون.. قلي بابا لك تمسيح الجوخ للمسؤولين ما بقى عالتلفزيون، صار عالفيسبوك وتويتر وهالشغلات ... قلتلو العمى اذا صحي .. قلي والله صحي
قلتلو بابا حبيبي بهيج طيب وانت شو بدك تعمل؟ ... قلي انا بدّي كافح كل هالمظاهر وبين كل المسؤولين على حقيقتن وبين جوانب التقصير في كل موسسة، والأهم بدّي افضح كل فاسد بالدولة....
وإذ بمر جارنا المتطوع بالأمن أبو الريم وسلم علينا وقلو عمي بهيج كيفك؟ قاطعت الحديث وقلتلو والله بهيج حابب يصير صحفي بس خلص دراسة .. قلو ابو الريم وشوبدك بالصحافة ؟ بتلاقي الصحفيين مشرشرين بالشوارع اذا في شي شغلة وبتلاقيهم عّم ينطوطو حوالي المسؤولين ..
قلو بهيج انا بدّي افضح وبين كلشي عّم يصير بالمخفي من هدول المسؤولين ...
وزعق أبو الريم هداك الصوت وقلو: بدك تفشي أسرار الدولة يا حيوان ؟
