حق الورد
-
المشهد - 2019/07/04
- 1986
المشهد بالشقلوب
- خيي بو نظير شو هادا حق الورد؟ سمعت عالراديو إنو الحكومة محتفظة فيه.
- أهلين أبو شفيق، حق الرد الرد..
- حق البرد!! اي هنن يرخصوا المازوت ويحتفظوا بحق البرد ما مشكلة، لعمه حتى البرد صاروا يبيعوا ويشتروا فيه لا حول ولا قوة، قايم اكتبا عالفيسبوك.
- لك تعا لهون، أبو شفيق ركب سماعاتك حق الرد الرد ضد اسرائيل، لأنو انقصفنا.
- اسرائيل، حق الفرد!! والله ما منستحي معقول نحتفظ بحق الفرد واسـ...
- أبو شفيق (بنص دانه) حق الرد. حق الرد اللي عضاريط بلدك رُوَّاد قهاوي الخمس نجوم بأربع كبسات ع موبايلاتن اللي حقها قد راتبك سنة، مزعوجين من احتفاظ الحكومة بحق الرد وهنن كلن يا مزبطين العسكرية يا مزبطينا، وبيقلك وين الـ إس ٣٠٠ لأنو لازم يركبولوا وحد عالبلكون ليرتاح!!! هلق بيناتنا الحكومة محتفظة بكل شي البركة بس هاد الوحيد اللي معها حق تحتفظ فيه. (راتب أبو شفيق ٤٠ ألف شهرياً أي ٤٨٠ ألف سنوياً أقل من سعر آيفون العضروط الممتعض من الاحتفاظ بحق الرد، أبو شفيق نصف أطرش ويعمل مهندس صوت في الإذاعة الرسمية) والأحلى هنن المناضلات أعلى طاولات البارات، مخلصة سولاريم من ساعة وحق تيابها بيعلم ولد سنة وعم ترقص أثناء القصف بس ما بيفوتها تمسك موبايلا وتسجل موقف إنو تتمسخر على تخباية الحكومة لحق الرد وتسأل عن الـ إس ٣٠٠ بس بالإنكليزي، وإذا اخوها انطلب احتياط بتبكي بحضن البابا ليسفرو. طيب يا عضروط ويا عضروطة إذا انت وحبيبك واخواتك مفلسعين من العسكرية بمين الحكومة بدا ترد؟!؟!؟! ولا بتستمتعوا إنها ترد باللي بتنعوهن ع صفحاتكن بين غدا الخمس نجوم وجلسة المنيكور.
- بونظير صاير مثقف، ومتحكي بالصميم، أثرت بصميمي والله، قوم تنتعشى فلافل عازمك عندك بالدكان.
- بعدين أبو شفيق، لك نحنا ما منعرف نحب بلدنا.. نحنا منحبا بس إذا قبضنا حق هالحب..
- مو الكل .. مو الكل هي أنت وأنا، ابني وابنك عالجبهة وبلا حق الرد ... شو حق الورد عمو؟ (لصبي يبيع الورد) مسوك بو نظير هي من أخ لأخوه، انشالله تمسكا معك أم نظير وتورجيك حق الرد ع أصولو.....
"في بيتنا تلفزيون" لازال يتبع...
